'Na vota nci steva 'na mamma e tineva 'na figlia ca si chiammava Tirisella, e 'a mannàva 'a maesta. Vicino a chesta maesta, ci steva 'e case r'o figlio r''o Re, e Tirisella ogni sera jeva adacquà 'a majurana r''a maesta. 'Nu juorno 'o figlio r''o Re s'affacciav'a coppa 'a finesta e 'a virètte e li ricette:
- Tiresella, Tirisella, aràcqua bona 'sta maiuranella!
Chesta si ni trasette a rinto, tutta 'mpistata . 'A maesta li spiava picché steva accussì, e iesse li rispunnètte comme l'aveva ritto 'o figlio d''o Re. 'A maesta li 'mmiziava:
- N'auta vota ca t''o dice, tu li deve rispònnere: E tu ca si' figlio 'e Re 'ncurunato, còntami quanta stella stanne 'ncielo e quanta rena a mare.
'A sculara, 'a sera, jette aracquà 'a majurana; 'o figlio d''o Re s'affacciava 'n'auta vota:
- Tirisella, Tirisella, aracqua bona 'sta majuranella!
- E tu ca sì' figlio 'e Re 'ncurunato, contami quante stelle stanne 'ncielo e quanta rena a mare.
'O figlio d''o Re si ni trasette pure tutto 'mpistato e dice tra isso stesso "Va buono mo' t'acconcie i'!" Piglia, va addo''a maésta, rice - Majé, i' mo' vaco vinnènne 'e pisce, vui mannàte Tirisella accattàrle e dicitincélle pure che chiaitàsse.
'O figlio d''o Re si rignètte 'na spasa 'e pesce, e 'e ghieve vinnènne. 'A maesta ricette.
- Tirise', va accàtta miezu ruòtele 'e pesce, e chiatènne assai.
Tirisella scenne abbascio:
- Bell'òmme, damme miezu ruòtele 'e pesce.
- I' nun 'o venco a dinari, 'o dò a chi mi rà 'nu vaso.
- Ebbìva isso, vo' 'nu vaso a me! Ramme 'o pesce e damménne assai.
- No! I' 'o dongo a chi mi rà 'nu vaso
E ca sotto e ca 'ncoppa, Tirisella mette 'e mane rinto 'a sporta; piglia 'o figlio r''o Re le rette 'nu vaso. Tirisella si ni jette 'ngoppa tutta 'ngullaràta. 'A sera jette a 'racquà n'auta vota 'a majuranella. 'O figlio d''o Re rice:
- Tirisella, Tirisella, 'racque bona 'sta majuranella.
- E tu ca sì' figlio 'e Re 'ncurunato, contami quanta stelle stanno 'ncielo e quanta rena a mare.
- 'O vaso avisti, ma 'o pesce no' aviste!
Tirisella si ni va 'ngoppa:
- Maesta, mia maesta, mi vulìstivi fa i' accattà 'o pesce, e chillo nun era 'o piscia- juolo, era 'o figlio r''o Re.
- Statti zitta, ricette 'a maesta, mo' t'acconcie i'. Accàttati 'na mula, e po' vaje alluc- canne: Chi da' 'nu vaso 'nculo a chesta mia mula , i' ci dò 'a mula con tutta la mia cintura.
Tirisella si veste a ommo, s'accatta 'a mula e passa pi' sotto 'o palazzo d''o Re alluccànno:
- Chi da' 'nu vaso 'nculo a la mia mula, i' ci dò 'a mula cu' tutta 'a cintura.
'O servo d''o Re 'o sintètte e rice:
- Signo', affacciàtevi. Che bella mula sta ccà sotto e sintite pure comme chillo bel- l'ommo allùcca. Picchè nun ci jate?
'O figlio d''o Re primma nun ci vuleva ì', ma po' ricette:
- Facìtele trasì rinto 'o palazzo.
'A facettero trasì. 'O figlio d''o Re jette pi' da' 'o vaso 'a mula, li facette 'mmocca.
Tirisella afferra 'a mula e si ni fuje. 'A sera jette aracquà 'a majurana: 'a vère 'o figlio d' 'o Re e dice:
- Tirisella, Tirisella, ràcqua bona 'sta majuranella
- E tu ca si' figlio 'e Re 'ncurunato, contami quanta stelle stanno 'ncielo e quanta rena a mare.
- 'O vaso aviste, ma 'o pesce no' aviste.
- 'A cacata 'mmocca ti pigliasti, ma 'a mula manc'aviste.
'O figlio d' 'o Re si ni trasètte: "Jessa ièra, va buono! Aggi'a pinsà i' mo'!" Va addo' 'a maesta e dice - Maje', stanotte, avìta fa' cuccà Tirisella cu' buje, picché i' l'aggia fa 'nu currìvo.
Quanno fuje 'a sera 'a maesta facette cuccà Tirisella cu' iessa, facènne abbiré ca aveva còsere 'nu lietto e l'aveva ajutà 'a sera. 'A notte 'o figlio d''o Re si mette sotto 'o lietto cu n'ago saccuràle 'mmano, e 'a pogne tutta quanta. Tirisella faceva:
- Maesta, mia maesta, pùlice e pìmmice dint''o lietto vuosto!
- Ruormi, figlia mia, ca so' linzola nove, nun so' puoste a lietto ancora.
'N'autu poco Tirisella si senteve pògnere:
- Maesta, mia maesta, pùlice e pìmmice dint'o lietto vuosto!
- Ruormi, figlia mia, so' linzola nove, nun so' puoste a lietto ancora.
E tutta 'a notte si facette 'stu vierzo. 'A sera appriesso Trisella jette aracquà 'a majurana; 'o figlio d''o Re esce 'n'auta vota:
- Tirisella, Tirisella, 'racqua bona 'sta majuranella.
- E tu ca sì' figlio 'e Re 'ncurunato, contami quanta stelle stanno 'ncielo e quanta rena a mare.
- 'O vaso aviste, ma 'o pesce no' aviste.
- 'A cacata 'mmocca ti pigliasti, ma 'a mula no' aviste.
- Maesta, mia maesta, pùlice e pìmmece dint'o lietto vuosto!
Tirisella si ni trase rinto, va addo' 'a maesta, rice:
- Maesta mia, vuje po' chelle che mi facìsteve, mi vulìstevi fa' cuccà cu' buje e mi facìsteve pògnere da 'o figlio d''o Re
- Nun te n'incaricà, nu' passa tiempo e ti faccio fa' 'a isso pure 'nu currìvo.
'Ncapo 'e rui juorni si sapette ca 'o figlio d''o Re steva malato. Piglia, 'a maesta 'o dice a Tirisella e la 'miziava ca si fosse vestuta 'a mierico, fosse juto là pi' li fa' 'na visita e l'avesse fatta 'na bona mazziata. Tirisella si veste 'a mierico, va là e dicette ca vuleva viré 'o malato, e ca pi' li fa' 'a visita avevano sta' 'nghiuse 'a rinto tutte 'e duje. Trasette rinto 'a cambra addo' steva cuccato 'o figlio r''o Re, si 'nghiurette e li facette 'na bona mazziata. 'O figlio r''o Re si mettette alluccà:
- Zi' mierico mio, 'nu chiù! Zi' mierico mio, 'nu chiù!
Piglia, Tirisella si spoglie e si da' 'a canoscere e po' si ni fuje. 'O figlio r''o Re ricette:
- Mo' mi l'aggia spusà, mo'.
Va addo' 'a maesta e le rice ca si vo' spusà Tirisella: 'a maesta 'nce 'o dicette e Tirisella rispunnette ca sì. Va add''o patre e rice:
- Papà, 'o figlio r''o Re mi vo' spusà, ma vuje primme 'e tutto m'avite accattà 'na signora 'e zucchero, 'ròssa quanto a me.
'O patre accattàva, e Tirisella si spusava 'o figlio r''o Re. Quanno fuje 'a sera Tirisella nun si cuccàva iessa rinto 'o lietto, ma ci mettette chella signora, ci attaccàva rui fili: tirànne uno, chella pupata acalàva 'a cape, e tirànne 'n'auto l'aizàva. E si mettette sotto 'o lietto. 'O figlio r''o Re si cuccàve c''a spada sfudarata 'mmano e quanno fuje 'a notte si mettette a fa':
- Tirisè, t'allicuorde quanno mi facive arraggià?
Tirisella tirava 'nu filo e faceva rìcere sì.
- E ti ni truove pentita?
Tirisella tirava n'autu filo e faceva rìcere no.
- Tirisè, t'allicuorde quanno mi facisti cacà r''a mula 'mmocca?
- Sì!
- E ti ni truove pintita?
- No!
- E t' allicuorde quanno ti vististi 'a mierico?
- Sì!
- E ti ni truove pintita?
- No!
- I' t'accìro?
- Sì!
'O figlio r''o Re, sdignato, li ra' 'na botta; piglia, li va 'nu poco 'e zucchero 'mmocca:
- Uh! - ricette - si sapeva ca tu ieri accussì doce nun t'acciréva.
Iesce subito Tirisella 'a sotto 'o lietto, rice:
- E i' picché sapeva ca tu ieri accussì barbero, nu' mi so' cuccata cu' te.
E accussì po' tutte 'e duje stettero sempe 'nzieme e nu' s'annumminàvano chiù 'e cose passate.