'Na vota nc'erano 'no patre e 'na matre, che tenevano 'na figlia cchiù bella re lo sole. Morivo la mamma, e lo patre se tornavo a nzorà. Se pigliavo 'na femmena cchiù brutta essa re la pesta, e la figlia che nascette era cchiù brutta essa re lo riavolo.
'No iuorno, 'sta mamma aveva fa' la culata, e mannava la figlia bella a la casa de li sette muscilli pe se fa ra' lo teniello. Arrivava 'nnanzi a lo portone, e tozzelavo; s'affacciavo lo capoattone e addommannava:
- Vuoi salì pe' re scale re vetro o pe' quelle re cristallo?
La bella risponnette:
- Pe' re scale re vetro.
E lo capoattone ricette:
- Mo' cai ritto accussì, sagli pe' re scale re cristallo.
Rinto la prima stanza truvavo 'no muscillo che faceva lo lietto, e la bella nce l'aiuta- va a fa'; rinto a n'ata stanza n'ato muscillo che lavava, e l'aiutava a tutti quanti. Po' l'addommannarono se voleva 'na vesta re seta o re stoppa, e essa risponnette ca la voleva re stoppa: allora li muscilli nce la racéreno re seta con tante ate cose.
La bella, arrivata a casa co lo teniello, raccontavo tutto alla matrigna che, mmiriosa, mannavo a tornà lo teniello pe' la figlia brutta. S'affacciavo lu capoattone e addommannavo se voleva salì per la scala re vetro o pe' quella re cristallo. La brutta ricette:
- Pe re scale re vetro nce sagli sempe tu, io saglio pe quelle re cristallo!
Allora lo capoattone la facette saglie pe re grale re vetro. Trasétte rinto e cominciava a maltrattà tutti li muscilli, che all'ùrdimo volevano sapé si voleva la vesta re seta o re stoppa. Essa cercava 'na cosa bella e aveva tutte re brutte. La matrigna, gelosa re la figlia brutta, mettette la bella rinto a 'na votta re pece; ma arrivavo 'no figlio re lo Re, la liberavo e se la spusavo.