Dint'a no paese scordato a Dio, nci steva na vota na povera famiglia. Llà èreno tutti zappaturi, e nci steva na véreva ca teneva no figlio sulo. Quanno fu grussicciello, sto guaglione se votavo vicin'a mamma:
- Mà - risse - i' me ne vaco.
'A povera mamma, chiagnènno:
- Figlio mio, sul'a tte tengo! Si te ne vai, i' resto sola.
- Mà, me n'aggi'a ì', pecché chesta è 'a sciorta mia.
'A mamma l'abbracciavo, 'o vasàvo. E 'o figlio se ne ivo. 'O munno parlava, e chi 'a contava cotta e chi 'a contava crura:
- Comm'è fatto fìglito a t'abbandunà? E' tenuto sto core? Quanno è ditto ca torna?
'A povera fémmena ricéva chello che l'aveva ritto 'o figlio:
- M'è ditto ca se n'aveva ì'… chesta è a sciorta soia.
'A gente d' 'o paese però 'a voleva bene, pecché era na fatigatora e teneva no bono core. Passàveno 'e misi, l'anni… 'e vicini se stévano sempe accorte a sta fémmena: se pigliàveno nutizie, l'aiutàveno, li réveno curaggio:
- No' te preoccupà, - rice - chillo po', fìglito, prima o doppo vène.
Erene passati tant'anni, ma paricchi e paricchi, e sto guaglione no' tornava. Quanno fu no bello juorno, ind'a sto paese se sentiéro 'e campane sonà pe' tutt' 'o paese ca no' nze poteva resiste. E pure no profumo accossì forte, ma accossì forte!
- Maronna, e che pot'èsse?
Ind'a nienti 'a ggente s'accoglìvo tuttaquanta:
- Nui avimma veré sto profumo a ddo' vene.
Averamente, chiano chiano ngarràro a ddo' veneva sto profumo: veneva a na caverna fore paese. 'E primi accommenciàro a trasì. Comme traséveno dinto, 'a veré- vano tutt'allumàta e co' chillo profumo ca era na cosa! Quanno arrivàro a no certo punto, veriéro no giovane ncopp'a no lietto muorto. Tutt'attuorno na montagna 'e fiuri, e isso stiso ncopp' 'o lietto, bello quant' 'o sole. E allora tutti quanta:
- Maronna bella, e chisto chi è?
Venette pure chella véreva. Già prima ca traséva ind'a grotta, no paesano li risse:
- Ma fosse fìglito Alessio? E' a tanto tiempo ca manca e no' nze conosce cchiù.
'A véreva trasìvo e se fermavo ncantata a guardà chillo giova(ne stiso ncopp' 'o lietto:
- I' no' 'o saccio si è 'o figlio mio…
Pecché chillo era troppo bello llà ncopp'a 'o lietto. Po' li venìvo a mmente ca quanno era piccirillo 'o figlio era carùto pe' a scalinata abbascio, e s'era rutto 'o rinùcchio. S'accostavo 'e cchiù a 'o lietto, e risse:
Oi figlio, figlio, quanno d' 'a scala caristi,
no' merco a 'o rinùcchio te facisti…
Pigliàro 'e paesani e ghièro a scommiglià. Guardàro, e uno alluccàvo:
- Chisto è Alessio!
Uh, e che succirìvo rind'a chillo paese! Facèttero na grande festa pecché Alessio era turnato, e s'era fatto santo.
