Caterina quanno èva 'a chiesa, non se pigliava manco l'acqua santa, e sulo ca se guardava no cavaliere. 'O cavaliere no' sapeva nienti, e se sentéva 'a messa divota- mente. Finivo 'a messa, e 'o cavaliere se ne tornav'a casa, mènte Caterina se ne restavo a chiagne. Nci steva no confessore:
- Caterì, pecché stai a chiagne? Confessate, e fatti serva 'e Maria.
- I' manco me confesso e manco me fazzo serva… rind'a sto core mio nci sta sulo 'o cavaliere, e no' mm' 'o pozzo levà a capa!
- Figlia mia, - risse 'o confessore- tu stai mpeccato mortale: chillo già è dato parola a n'ata femmena nnanzi a 'o sacramento - po' ivo addo' 'a Mamma 'e Gesù - Maria, Maria, verimo c'amma fa': llà nc'è na ronna tanto peccatrice ca già tène 'e pieri rind'a casa 'e riavolo.
'A Maronna se votavo vicin' 'o figlio:
- Figlio mio, vanci tu addo' Caterina, parla cu essa…
- Mamma, mamma, addo' me vuo' mannà? I' so' Cristo, ma essa no' mme crére.
- Tu te ne vai pe' miezz' 'a chiazza a passià. Chella, Caterina, quanno te vére, pe' 'e servi te manna a piglià.
Gesù accossì fece; se vestivo a cavaliere, e ghivo miezz' 'a chiazza a passià. Caterina comme 'o vedìvo, 'o mannavo a chiamà. Comme Gesù trasìvo pe' 'a porta:
- Oh, cavaliere mio, ramme no vaso co' sta vocca roci.
- Caterinella, Caterinella, fatt'arrasso, ca tu puzzi 'e peccato mortale.
Quanno se mettèttero a tavola, 'o cavaliere che toccava toccava, ogni cosa arreven- tava tutto chino 'e sango.
- Cavaliere mio, o cavaliere, ve fùsseve tagliato? Caterinella ve vo' rà aiuto.
- Cheste non so' tagliate… manco a te i' voglio aiuto.
Allora Caterina rice:
Facimo no core 'e sasso
e ghiamoncénne a lietto a piglià spasso

'O cavaliere s'abbiavo, ma quanno trasivo dint'a càmmera Caterina 'o trovavo misso croce, e se fece rossa comm'a na vampa:
- O maromé, che m'è succiesso? So' trentatré anni ca no' mme confesso, so' trentatré anni ca stongo mpeccato mortale.
Allora Gesù Cristo co' 'a vocca 'a confessavo e co' 'e mmane 'a communicàvo:

Caterinella, Caterinella tu rumani avvocato
d' 'o Paraviso, amen