Na vota nci stevono dui zappatori, 'no padre e 'o figlio. No juorno iévono a zappà 'a terra 'a vigna. Doppo no certo tiempo, 'o figlio sentivo fame, ma no' ddicìvo nienti, aspettànno ca 'o padre sentéva fame pur'isso. E continuava a zappà, isso ccà e 'o padre cchiù llà. Passa n'ora, e nienti; passa n'at'ora, e nienti; sonavo 'a messa 'e l'ùnneci, e nienti… allora se mettìvo a fa':
- Tata, tata, tengo fame.
E 'o padre:
- Non è benuto ancora 'o ppetito.
'O figlio calavo 'a capo e tornavo a faticà. Ma 'a fame se faceva sènte, e cchiù tardi, quanno sonavo miezzojuorno, parlavo n'ata vota:
- Che aspettamo pe' mangià?
E 'o padre, sempe:
- Non è benuto ancora 'o ppetìto.
- Tata, ma chi è sto Petito? Isso non vène mai, e nui mai mangiamo? I' tengo na fame!
- Tu tieni fame a 'o vero? - responnìvo 'o padre. Arapìvo 'a bisaccia, pigliavo no piezzo 'e pane e nce 'o divo.
- Chisto è tuosto - fece 'o guaglione.
- Hé visto ca 'o ppetito ancora non è arrivato! - responnìvo 'o padre. Se tornavo a piglià 'o pane e 'o mettìvo n'ata vota rind'a bisaccia. Po' tornàro tutti e dui a zappà. Quanno fu ventunòre, 'o padre se fermàvo 'e zappà, tornavo a piglià chillo pane e nce ne divo na parte a 'o figlio. 'O figlio ss' 'o pigliavo e ss' 'o mangiavo, pecché mò sì ca teneva fame, e 'o pane mò era tenero e doce comm' 'o mmèle.