Nci steva na vota no Re ca se pigliavo no garzone pe' governà 'e cavalli. Passavo no mese e 'o garzone se ne éva ì'. Risse accossì:
- 'O mese è fenuto, tutto è a posto… mò me ne pozzo ì'.
'A notte 'o Re s'era sonnàto ca ncopp'a na montagna nci steva no montone d'oro, e chi 'o ghiev'a piglià no' poteva cchiù tornà arrèto, ma s' 'o mangiavano 'e cuorvi.
- Va bbuo', - rice 'o Re - però, prima ca te ne vai, accìri no cavallo, piglia 'o piello e t'arravuògli dinto. Po' nci mettìmo tutte e dui nguollo a n'ati dui cavalli e partìmo…
E accossì fece. Quanno arrivàro a no pizzo, vicin'a no sciumo, scenniéro. Scenniéro llà, e 'o padrone rivo a 'o garzone na pistola. Rice:
- Mò vèneno 'e cuorvi, pecché sènteno 'a puzza 'e carna, e te pìglino. Te piglino e te portano a chella parte d' 'o sciumo, int'a na montagna, addo' nci sta no nontone 'e oro. Tu, quanno sì' llà, co' sta pistola spara: comme 'e cuorvi se ne fùieno, tu te pigli l'oro e mm' 'o ghietti a chesta parte.
'O garzone ivo e quanno fu a l'ata parte d' 'o sciumo, se trovavo dint'a na montagna chiena d'oro. Ma non poteva cchiù trovà a via pe' tornà. 'O padrone a l'ata parte d' 'o sciumo faceva:
- Accuogli e ghietta a mme.
- I' no' te ne ietto manco no' tantillo, si no' mme rici 'a via pe' ddo' aggi'a venì.
- Tu ietta prima l'oro, si no' comme fai a passà 'o sciumo…
'O garzone se feci cunvingi e li ittàvo l'oro, ma 'o Re, na vota ca avivo mmano tutto, se ne ivo e lassavo 'o garzone llà. Cerca a ccà, cerca a llà, ma chi te vo' fa' luci? 'o garzone no' potivo trovà cchiù 'a via pe' tornà arrèto. E se ne ivo 'a ventura. Camina e camina pe' ghint'a sta montagna, e non trova 'a via. A no certo punto trova na fontanella co' l'acqua. Se ferma a beve.
- 'A seta mm' 'a so' levata. Mò sento fama…
Mènte steva llà venivo a bbeve na palummella. 'O garzone l'acchiappavo co' a mano:
- T'aggi'a mangià viva viva - risse.
- No' mmi mangià - risse sta palummella - ca i' so' 'a sciorta toia.
- 'A sciorta mia?
- Sì, songo 'a sciorta toia… e mò sa che buo' fa', si vuo' trovà amore e fortuna? Camina, e cchiù nnanzi scunti tre uòmmini: uno tène li stivali, ca si te 'e mitti a 'o père curri cchiù d''o viento; n'ato tène na borza, ca è sempe chiena 'e sordi, e cchiù nci 'e lievi e cchiù nci ne truovi; 'o terzo tène no paro 'e lente: quanno t'e mitti a l'uocchi, tu viri a illo, ma illo a tte nun te vére cchiù.
Chisto camminavo camminavo, e overamente trovavo sti tre cristiani. Cacciavo no foglio a sacca e disse a chillo co' 'e lente:
- M' 'e mpriesti? Aggi'a leggi sta lettera ca m'è mannato mamma.
Sto cristiano nce 'e divo. 'O garzone comme se 'e mettivo, dicivo:
- Mò me verìte?
- Noni - rìssero sti tre cristiani.
- E no' mme verìte cchiù!
Levavo 'a borza a uno e 'e stivali a l'ato. Se 'e mettivo a li pieri e volavo comm'a 'o viento. Arrevàvo a na taverna e se fermavo. Llà mangiavo e bevìvo. 'O tavernaro mò teneva tre figlie zite e, verènno ca chisto tenéva tanta soldi, nce 'e fece veré. Mò ne mannava una vicin' 'o tavolo 'e chisto, mò n'ata, mò n'ata. 'O garzone sùbbeto se nnammoràvo d' 'a prima. Rice:
- Mò aggi'a ì' a fa' prima no palazzo nnanzi a chillo d' 'o Re, 'o padrone mio, po' quanno torno…
Accossì fece. E 'o Re, verénno 'o palazzo d' 'o garzone assai cchiù bello d' 'o sua, scat- tavo ncuorpo pe' 'a mmiria. Quanno tornavo 'o garzone se sposavo 'a figlia d' 'o ta- vernaro, e co' a borza chiena 'e renari campavo a signore…