Rind'a 'no paese 'e chisti, na vota nci steva no zappatore ca teneva no padre viecchio assai. Chisto, no soldo 'a vota, s'era stopàto 'e renari pe' quanno avev'a morì, pe' avé no buono funerale.
No' passavo assai tiempo, e sto viecchio morìvo. 'O figlio, mò , no' voleva spènne 'e renari d' 'o vecchio pe' nce fa' 'o funerale, e allora che penzavo 'e fa'? Arrovugliàvo rind'a 'na coperta 'o padre, 'o carrecavo ncopp'a no traino e se portavo co' isso pure 'o figlio ca era no guaglionciello, pe' se fa' aiutà a atterrà 'o viecchio.
Quanno arrivàro rind'a vigna, 'o zappatore co' 'o figlio scavavo 'na fossa. E rind' 'a sta fossa nci ittavo 'o padre. Po' pigliavo 'a pala, e tanno steva pe' ghiettà 'a prima palata 'e terra rind'a fossa, quanno 'o figlio li levavo 'a cuperta a cuollo a 'o tatone.
- Embè, che fai? - addommannàvo 'o zappatore a 'o figlio.
- Me piglio 'a cuperta, pecché no' nza mai scappa no' pere a tte e muori, comme fazzo senza?
Comme sentìvo accossì, 'o padre romanìvo. Po' scennìvo rind' 'a fossa, se pigliavo nguollo 'o padre, 'o portavo n'ata vota a casa, e li fece no funerale 'e lusso, senza badà cchiù a spese.