Na vota, no funaro se ne steva a 'o sole senza fa' nienti. Se resperàva pecché nisciuno li portava 'a fatìca, e no' poteva pagà 'e riébbiti. No juorno, passa 'a Fortuna e ddice:
- Funa', che fai qua spaso a 'o sole?
- Bella signo', sto morènno 'e fame, so' risperato e chino 'e riébbiti!
- No' te preoccupà, mò nci penzo i' - risse 'a Fortuna, e li rivo na borza 'e reanari pe' pagà tutt' 'e riébbiti. Co' 'o tiempo 'o funaro se consumavo tuttiquanta 'e sordi, e fece ati riébbiti. Carìvo n'ata vota mbascia fortuna, e se tornavo a métte spaso a 'o sole: se respirava, aspettanno ca passava caccherùno ca l'aiutasse. Passavo 'a Bona Sciorta, li risse:
- Funa', tu che ffai lloco?
- Eh, che te voglio rici, Bella signo'? I' so' risperato, non tengo fatìca…
- Mò t'aiuto io: va abbascio a 'o sciumo a pescà, si vuo' mangià.
'O funaro, ca non era mai piscato, piscavo no pesce gruosso e 'o portavo 'a casa. Mènte 'o pulizzava, li trovavo ncuorpo na palla 'e chiummo. Chisto, mò, no' sapeva manco che era: 'a ittavo llà e se mangiavo 'o pesce. No juorno passavo no mercante e ghieva cercanno robba vecchia pe' s' 'a accattà. Li risse:
- Funà, tenissi robba vecchia a vénne?
'O funaro s'arrecordavo ca teneva ancora chella palla 'e chiummo:
- No' tengo nienti, m'è rimasto sulo sta pall' 'e chiummo. Te servésse?
'O mercante guardavo 'a palla e s'addonavo ca non era 'e chiummo, ma r'oro. Li rivo no sacco 'e renari e s' 'a accattavo. Sulo accossì 'o funaro, co' tutti sti renari addiventavo ricco e mutavo condizione na vota pe' sempe. Mò jeva dicenno a tuttiquanta l'addommannàvano:

Pe' m'assollevà non è bastata 'a Fortuna,
nc'è voluta 'a Bbona Sciorta co' a palla 'e chiummo!