Na mamma e no figlio stévano sempe senza renàri. Tanta vote mangiavano sulo 'o ppane: 'a scorza pe' primo e 'a mollica pe' secondo. No juorno ca non tenevano manco chesto, 'a mamma risse nfacci a 'o figlio:
- Piglia sta cuperta, e viri si a truovi a vénne.
'A cuperta era vecchia e cunzumata, e 'o figlio no' trovava nisciuno ca se l'accattava. Se fermavo vicin'a na ghiesia, sott'a na statua 'e S. Antonio. v- Te vuo' accattà sta cuperta?
Uttàva 'o viento e siscàva. E sto uaglione penzava ca 'a statua riceva:
- Sìii… sìiiiii…
- Allora te 'a lasso qccà?
- Sìii… sìiiiii…
- 'E renari mò quanno mme ddai?
Passàveno 'e curnacchie p'o cielo, e faceveno:
- Cra… cra… cra…
- Ah, crai? E i' crai vengo. Ma tu famme truvà 'e renari.
Mettivo 'a cuperta mbrazz'a sant'Antonio, e se ne ivo. Turnavo 'a casa, e 'a mamma:
- Hé vennùto 'a cuperta?
- Ca sì!
- 'E sordi addo' stanno?
- 'E ditto ca mm' 'e ddai crai.
Quanno fu 'o juorno appriesso, sto uaglione tornavo a ghì'. Ivo llà e no' truvavo cchiù 'a cuperta.
- Addo' so' 'e sordi? - rice nfacci 'a statua.
E n'ata vota 'e cornacchie, volanno:
- Cra… cra…cra…
Tornavo a casa, e 'a mamma alluccàvo:
- Mò simo rimasti senza sordi e senza cuperta.
- Noni, mà, chillo è ditto ca me paga crai.
- Bè, crai pure vène!
'O juorno roppo 'o guaglione se pigliavo na bella piròccola mmano, e ghivo: "Mò si no' mme rai 'e renari, so' palate!" Quanno fu nnanzi 'a statua 'e sant'Antonio:
- Uagliò, 'e renàri!
- Cra… cra…cra… - sempe 'e curnacchie.
- Mò te fazzo veré i' si è crai e si è oje! - aozavo 'a piròccola e divo na mazzata accossì forte ca rompivo 'a statua. 'A statua se fece a milli piezzi, e a rindo cariéro ciento marenghe r'oro. S''e pigliavo tuttequanta, 'e mettivo rind'a còppela, e se ne turnavo 'a casa.
- 'E bbì? - rice vicin' 'a mamma - Hé visto ca mm' 'e ha dato! Steva a isso a no' mme 'e ddà!
- Uh, che bello figlio tène 'a mamma. Bell'e stuto tuttoquanta! Porta a ccà sti renari.
'E pigliavo e se 'e mettivo annaccovàti rind'a 'e pignatielli. 'O juorno appriesso, 'a mamma se ne ivo a faticà ind' 'a terra. Rice vicin' 'o figlio:
- Si viri na bella jornata, fa trasì no poco 'o sole rindo casa.
- Sine, mà!
'A mamma se ne ivo, e 'o lassavo sulo. No' passavo assai tempo, e assivo 'o sole.
Chisto momò che fece? Saglìvo ncopp' 'o titto e levavo tutti 'e ìrmici. Quanno turnavo, 'a
mamma risse:
- E tu c'hé fatto?
- Tu hé ditto c'avev'a fa trasì 'o sole rindo? E i' accossì aggio fatto.
Quanno fu n'ato juorno ca 'a mamma no' nci steva, passavo no monaco ca portava 'e pignatielli pe' accogli 'a nzogna pe' 'o commento.
- E' ditto mamma: mme dai no pignatiello?
'O monaco li rai no pignatiello:
- Quanno po' accirìti 'o porco, m' 'o vengo a piglià chino.
- E pecché hé a turnà ccà n'ata vota? Nui 'e pignatielli già 'e tenìmo chini.
Trasivo rindo, pigliavo no pignatiello chino 'e marenghe e nce 'o ddivo a 'o monaco.
'O monaco quanno verivo tutti chilli renàri, arapìvo l'uocchi:
- Sulo chisto tieni? No' nne tieni cchiù?
- Eh, avissi voglia, zi' monaco mio! - risse 'o guaglione, e li purtavo tutti 'e pignatielli.
'O monaco li lassavo 'e pignatielli sua e se pigliavo tutti 'e pignatielli co' 'e marenghe. Quanno tornavo 'a mamma e verivo tutti chilli pignatielli rindo casa, risse:
- E ca a fa' co' tutti sti pignatielli?
- 'O monaco m'è lassato.
- E tu che l'è rato?
- Nce aggio rato tutti 'e pignatielli chini.
'A mamma voleva accìre 'o figlio:
- Che hé fatto? Nc'è rato tutti 'e renari.
- Mà, no' te piglià raggia. I' mò l'arrivo e mm' 'e fazzo da' n'ata vota.
Pigliavo 'a piròccola e corrìvo appriess' 'o monaco. L'arrevavo, l'accirìvo e li levavo tutt''e marenghe. Se mettivo ncuollo 'o monaco e tornavo addo' 'a mamma.
- Maronna, sì' acciso zi' monaco. E mò?
'A mamma che penzavo 'e fa'? ittavo 'o muorto ind' 'o puzzo, e po' risse vicin' 'o figlio:
- No' ghittà 'o banno, mò! - rind' 'a notte, però, mènte 'o figlio rurméva, s'azavo, accirìvo no piécoro e ghittavo pure a chisto rind'o puzzo. No juorno veniéro 'e guardie. Quanno addommannàro si era passato no monaco, sùbbeto 'o figlio, stordo comm'era, risse:
- Sine, i' 'o aggio acciso, e mamma l'è ghittàto rind'o puzzo.
- No' 'o state a sentì - fece 'a mamma - Fìglimo è no poco scemo, è romasto comm'a no criaturo…
No' 'a crerèttero. Na guardia se calavo rind' 'o puzzo. 'O puzzo era nfuto, e non se veréva.
- Ch'è truvato? - addommannàvo 'o capo.
- Qua nc'è na cosa… - responnivo chillo abbascio - ma 'o monaco teneva na sottana 'e lana?
- Noni, teneva no mantello - chillo a coppa.
- … e 'o monaco teneva 'e corna? - chillo a sotta.
- Chisti mò non so' fatti mia. - responnìvo 'o capo.
Quanno 'a guardia nghianàvo ncoppa 'o piecuro, risse 'a mamma:
- T'aggio ritto io? Qua monaco e monaco jati truvanno vui? Chillo fìglimo se l'è sonnato!
Accossì fenivo. A chillo juorno, a essa e a 'o figlio no' nce mancavo cchiù nienti.