Nci steva na vota no signore c'aveva abbesuogno 'e no garzone. Ivo mpiazza e ne trovavo uno. Rice:
-Vuo' venì' a faticà' co' mme?
- Sì, facimmo 'o patto.
- Acqua franca e cinco rocati a 'o mese. - rice - E si te pigli collera tu, co' l'ogna te levo na striscia 'e pelle a copp'a capo fin'abbascio a 'o carcagno d' 'o père; si po' mme piglio collera i', tutto chello ca è mmio t' 'o pigli tu!
- Va' bbuo'! Mò nienti voglio, sulo n'accetta e na pistola pe' 'e lupi.
'O primo juorno, 'o padrone 'o mannavo a pasci 'e pecure. Rice:
- Cheste so' 'e pecure, chisto 'o paniello 'e pane: hé a mangià tu e 'o cane; ma quanno tuorni, hé a purtà adderèto 'o paniello sano.
'O garzone se ne jo. Quanno fu rind'a muntagna, pigliav'accetta, accirìvo na pecora, appicciàvo 'o fuoco, 'a cucivo e s' 'a mangiavo. Chelle ca non se mangiavo isso, co' tutte l'osse, 'e divo a 'o cane. 'A sera s'arritiràvo, 'o cane sazio e illo pure. 'O padrone cuntavo 'e pecore; a l'urdemo, co' na faccia appesa rice:
- Uaglio', qua nci manca na pecora.
- Ma pecché, v'avite pigliato collera?
- No, io manco pe' 'o cazzo!
- E io, manco pe' no cazzo e miezzo!
N'ato juorno 'o mannàvo a pasci 'e puorci. 'O mannavo a pasci 'e puorci, e 'o garzone fece 'o patto co' chianghiéro:
- Te vénno sti puorci pe' vinti rocàti, e tu me rai pure 'e rrecchie co' tutt'e core.
Quanno s'arretiravo 'a sera, 'o padrone contavo 'e puorci:
- Qua nci ne mancano rieci.
- Padro', chilli so' affonnati a na parte e, tira e tira, tira e tira, se ne so' benùte sulu 'e core e 'e brecchie... e vvi' ccà! Ma 'e puorci so' romasti rind'a llà.
- Tu mi siervi malamente!
- Padro', v'avìsseve pigliato collera?
- Noo, manco pe' 'o cazzo!
- E io, manco pe' no cazzo e miezzo! - risse Malemisiervi.
N'ata vota 'o mannavo a caccià 'e bacche a rind'a stalla:
- Cacciale co' a porta chiusa! - li risse 'o padrone - e fa na cosa e juorno!
- E comme fazzo?
- No' 'o boglio sapé, so' fatti tua: va' llà, e tirale fore!
- Ah, accussì è? - jo llà, pigliav'accetta, scassav'a porta pe' quanto potivo trasì a rindo. Po' accirìvo 'e bacche, 'e fece a piezzi a piezzi, e 'e ghittàvo fore, no' piezzo 'a vota, pe ghind' a fenestrella. Jo add' 'o padrone:
- Io 'e aggio cacciato.
- E tu accussì 'e cacci? Tu l'hai accìso tutte.
- Ma vui v'avìsseve pigliato collera?
- Nooo! Manco pe' 'o cazzo!
- Tu? E io manco pe' no cazzo e miezzo!
'O padrone no' nne poteva cchiù. 'A mogliera li risse:
- No' lassà ca piglia père: chisto vo' veré case carùte. Nui l'avimma mannà, si no nce arrovìna.
'O juorno appriesso 'o padrone si chiamav'a Malemisiervi:
- Quanno vuo' turnà a càseta, mm' 'o dici.
- Padro', - rice - me ne vaco, quanno canta 'o cuculo.
'O padrone nce 'o disse 'a mogliera. E 'a mogliera rice:
- 'O cuculo canta sulo a 'o mese d'abbrìle. Mò stamo a giugno... n'at'anno chisto chi s'o fire 'e suppurtà? E po' i' tengo no core scuro!
Comm'aggi'a fa', comme non aggi'a fa'? A l'ùrdemo 'a mogliera:
- Sa' che bolimo fa'? - rice - Mò che fa scuro, io saglio ncopp'a l'arbero nnandi casa, e canto comm'a no cuculo...
- Buono rici. - fece 'o marito.
Quanno 'a sera Malemisiervi tornavo co' 'e pecore. 'A padrona ca steva ncopp'a l'arbero, se mettìvo a fa' cucù, cucù, cucù...
- 'O sienti? - rice 'o padrone.
- 'O sento, 'o sento: 'e chisti tiempi chillo porta scalogna - risse 'o garzone. Cacciavo 'a pistola a rind'a sacca e sparavo. Accirivo 'a mogliera d' 'o padrone.
'O padrone se mettivo alluccà:
- Ch'è fatto? M'è acciso 'a femmena!
- Ma ricìteme: vui v'avìte pigliato collera?
- Si m'aggio pigliato collera? E m'addommani pure? Me so' pigliato collera sì!
- Allora t'arricuordi 'o patto? Tu hé perso 'a scommessa: tutto 'o tuo mò è robba mia!
Co' no palo cacciav'o padrone a rind'a casa, e se pigliavo tutto isso.

'A collera è fatta a ccuoppo:
chi s' 'a piglia se scatta ncuorpo!