Quanno 'o Pateterno creavo 'o ciuccio, 'o mettivo nome Barone. Roppo poco tiempo 'o ciuccio se ne scordavo d' 'o nome suo, e ghivo add' 'o Pateterno:
- Signo', - addommannàvo - ma i' comme me chiamo?
- Barone, te chiami Barone.
Passavo n'ato juorno e tornavo a ghì':
- Patetè, te cerco perdono, ma i' comme me chiamo ?
- Te chiami Barone, Barone, Barone… - nce 'o repetivo ciento vote - e non te 'o scurdà cchiù.
- None, none! sta vota no' mm' 'o scordo cchiù.
No' passavo manco n'ora ca 'o ciuccio era n'ata vota llà:
- Signo', comme me chiamo? I' me 'o so' scordato n'ata vota…
- Puozzi avé! Iusto mò t'aggio ritto! ma tu no' t'arricuordi proprio nienti? Sì' proprio no ciuccio. Ciuccio, ciuccio, ciuccio tre bote. Va'! a chisto mumento te chiami ciuccio.
Sul'accossì 'o ciuccio no' se scordavo cchiù 'o nome suio. Rice bbuono 'o proverbio:

A lavà 'a capa a 'o ciuccio,
nci pierdi l'acqua e 'o sapone