Nci steva 'na vota 'n'uorco e 'n'orca, tenévono 'no bell'uorto, chi no' nci mancava nienti: tutto quello chi bulivi steva llà. L'uorco teneva assai caro 'no pede 'e per- còche, e poveriello a isso chi nci capitava, si ne trovava uno mancante. Ogni sera si jeva addonà dinto a l'uorto pe' vedé si 'e percòche erano juste. 'Na sera ne trovavo sei mancante, e no' poteva arrivà a sapé chi era ca s''e faceva. 'A sera appriesso sdignato s'annaccovàvo arrèto a 'no pede 'e fico, e si mettivo a fa' 'a spia, e dicivo:
- Si arrivo ancappà, m' 'o voglio mangià sano sano.
Come s'abbicinàvo l'ora, chillo solito scennìvo 'o muro 'e l'uorto, e steva saglièn- no 'ncoppa 'o pede 'e percoche, quanno sùbbito escìvo l'uorco e dicivo:
- Tu ieri 'o mariuolo, mo' t'acconcio io!
Accussì 'o afferravo e 'o portavo addo' 'a mogliere chi era l'orca, e dicivo:
- Moglièra mia, aggio ancappàto chillo chi s'arrobbàva 'e percòche: mo' 'nzèrralo dinto a 'na vòtte, o mìttilo dinto a chillo mandrìllo, come a 'no porciello, e dalli a mangià buono, ca quanno è 'ngrassato bello bello, facìmmo 'na bella tavola, e 'mmi- tàmo puro 'o compare nuosto, e nce 'o mangiamo. L'orca accossì facivo, e l'uorco ogni tre o quatto juorni iéva a bedé come s'era fatto. 'Ncapo a 'no mese, chillo poveriello tanto d''o mangià no' nzi poteva cchiù move'. L'uorco tanno era contento, e ivo vecino a l'orca, e li dicivo:
- Mogliera mia, mo' è 'o tiempo; piglia 'na cavodàra grossa, ìgnila d'acqua, e mettila 'ncopp'a 'o fuoco, ca io vavo a 'mmità 'o compare; quanno vengo, 'o tagliamo a piezzi a piezzi e nce 'o mangiammo, e accossì nisciuno nci 'nquieta chiù.
L'orca si mettivo a fa' 'o fuoco, e mènte steva tagliànno 'e legne, chillo 'a dinto 'o mandrìllo aveva sentuto tutte cose, e dicivo 'nfaccia a l'orca:
- Si mmi cacci a qua dinto, ti taglio io 'e legne.
L'orca sentènno questo, 'o pigliavo, e 'o cacciavo; e chisto, mènte che l'orca steva attizzànno 'o fuoco, li divo 'n'accettàta 'ncapo e accidìvo l'orca; po' pigliavo 'a capo, e 'a 'nzippàva 'mponta a no' ceppone, e 'a jvo a mette' commigliàta bella bella dint'a 'o lietto 'e l'uorco, e isso se ne fuìvo 'ncoppa 'o soppìgno. Si ritiravo l'uorco, e trovavo 'a cavodàra 'ncopp'a 'o fuoco chi bollèva e senza 'a mogliera vecino; po' jvo pe' vedé dint''o lietto e trovavo 'a mogliera morta; ivo pe' vedé dint'a 'o mandrillo, e no' nci trovavo nisciuno. Ivo vedènno pe' tutte 'e càmmere, arraggiàto come a 'no lupo, e diceva:
- Mme l'ha fatta! Si t'aggio 'mmano, manco l'osse nci voglio lascià!
E chillo 'a copp'a 'o soppìgno chi si crepava 'e risa. L'uorco si votava attuorno, attuorno, 'e no' vedeva mai nisciuno. Ivo revotànno pe' tutte parte, ma non 'o potìvo trovà, e chillo a copp'a 'o soppìgno chi sulo rideva. Dopo tanto tiempo, l'uorco jvo pe' azà l'uocchi e 'o vedivo, e li dicivo:
- Si tu mmi dici come sì sagliùto lloco 'ncoppa, io no' ti faccio nienti.
Chillo ca era malizziùso, dicivo 'ncuorpo a isso: "Mo' ti servo io!" E rispinnivo:
- Aggio mettùti spiti 'ncoppa a spiti, e accossì so' sagliùto.
L'uorco s''o credìvo, e ghivo pe' saglie e rimanìvo 'nfilàto. Isso scennìvo, s'arri- gliàvo tutte cose, e se ne jvo 'a casa soja.