'Na vota ci steva 'nu Re e 'na Regina, e tenevano 'na figlia. Chesta teneva 'a tuletta vicino 'a fenesta, e ogni matina si ieva a fa' 'a capa là. 'Nu iuorno, ammènte si steva facènne 'a capa, sente 'nu fruscie. Si va pe' butà, vere 'n'auciello 'ruosso 'ruosso; chisto si pigliava 'o pettine suio r'oro e se ne fuiètte. Chella se mette alluccà, trase rinto e 'o dice a 'o padre:
- Papà, papà, i' mi steve a fa' 'a capa vicino 'a finesta: è passato 'n'auciello 'ruosso 'ruosso, e s'ha pigliato 'o pettine mio r'oro. I' 'o voglio, i' 'o voglio!
- Statte zitta, figlia mia, papà te ne compra 'n'ato.
- No! i' voglio chillo, i' voglio chillo!
- Ma i' mo' addo' 'o vaco a 'ngappà?
- No! I' 'o voglio!
'O padre tanto facette, fino ca ce n'accattava 'n'ato, e chella s'accuitàva 'nu poco. Quanno fuie 'a matina appriesso, ca chella se steva facenne pure 'a capa vicino 'a fenesta, sente 'n'atu fruscie. Chillo stesso aucellone passa e si piglia 'o vacìle r'oro 'e chella; chesta rummàne accussì, corre add''o padre:
- Papà, papà, chillo stesso aucellone è passato pure mo', e s'ha pigliato 'o vacìle mio r'oro. I' 'o voglio, i' 'o voglio!
- E papà t'accatta!
- No! i' voglio chillo, i' voglio chillo!
- Ma i' che ci pozzo fa'? Chillo s' 'a pigliato; ce pozzo correre mai appriesso?
- I' 'o voglio, i' 'o voglio!
'O padre ci n'accattava n'ato: iessa s''o pigliava e se stette zitta po'. 'O iuorno ap- priesso, chella se torna a fa' 'a capa a 'o stesso pizzo: passa 'n'ata vota l'aucellone e si piglia 'a tuletta r'oro. Lesta iessa va add''o padre:
- Papà, papà, chillo è turnato 'a passà e s'ha pigliate 'a tuletta mia r'oro. I' 'a voglio, i' 'a voglio!
- Statte zitta, statte zitta, ca papà mo' te n'accatta 'n'ata; e po' quanno è dimane matina ca isso vene, nuie mettimmo 'o biccio 'ngoppa 'a fenesta, amméno quanno chillo vene azzecca, e nuie 'o pigliammo.
Quanno fuie 'a matina accussì facettero. L'aucellone si va pe' piglià chill'atu pettine, azzecca: iessa subito, subito 'o afferra e corre add''o padre:
- Papà, papà, i' 'o aggio 'ngappato! Mettimmelo rinto 'a caiola.
'O mettettero rinto a 'na caiola: isso sulo rinto a 'na cambra, e chella figliola, ogne tanto, 'o ieva a birè. 'Nu iuorno chillo le recette:
- Vué, i' te rico 'na cosa; ma tu nun hé a fa' sapè niente a nisciuno: i' nu' so' auciello, comme tu crire, i' songo 'nu figlio 'e Regnante. Aggi' avuto 'o restino ra 'e fate ca pe' ùnnece anne aggio ièssere accussì; agg' 'a purtà chesta spoglia. Ma, 'ncapo a chist'ùnnece anne, i' arrivento 'n'ata vota giovine. Mo' so' stato quatte iurne cu' tico, e mi stonche 'n'ati sette e po' me ne vavo, po'.
- No, tu t'hé a sta', sempe ca'; tu nun te' ne hé ì'!
- Nu' mi ci pozzo sta', se no 'e fate mi ranno 'o restino chiù gruosso.
- I' nun te ne faccio ì'.
- Sino! Quanno è benuto 'o tiempo, vire se mi ne vavo o no!
- E levatélle 'a capo, ca tu a ca' nun te ne vai chiù! T'hé sta' sempe cu nuie.
Corre add' 'o padre e rice:
- Papà, i' voglio mangià sola sola rint''a cambra addo' sta l'aucellone, e date roppia pietanza, pecché aggia ra' 'a mangià pure 'a isso.
- E chillo po' tanto mangia?
- Gnursi, papà, ratemélle ca chillo s''o mangia.
- E sino, figlia mia, sino
'O padre ci 'o deva e chella se 'nghiureva rinto 'a cambra; e mangiavano tutte e duie. Venimmegénne, mo' venette 'o tiempo ca chillo se n'aveva ì'; iessa 'nghiurètte porte e feneste. Ma chillo ch'era affattato, a mumento facette spaperanzà tutte cose e se ne fuiette. Pinzate chella com'avette rummané! Va add''o padre:
- Papà, papà, chillo se n'è fuiùto.
- E che t'aggi' a fa', pecché 'o hai fatto fui?
- I' aggio 'nghiuso tutte cose e chillo pure se n'è fuiuto.
- Figlia mia, mo' nun aggio che te fa'.
Piglia, chella se 'nghiura rint''a cambra, iessa sola, senza vulé mangià chiù, nu' buleva ascì, nu' parlava e nu' rireva chiù. Piglia, 'o Re verennòle accussì smussata 'n'aveva che fa' chiù pe' a fa' mòvere. Finalmente fa' menà 'o banno pe' 'o paese, ca chi faceva rirere 'a figlia o 'a faceva parlà, isso le reva 'nu 'ruosso comprimento; e tutte quante currevano, ma nisciuno ce puteva?
Lassàmme chesta mo', e pigliamme 'n'ata cosa. 'Na vecchia ieva cercanne a carità, s'abbuscava 'nu piezzo 'e pane, arrivava a 'nu pizzo se mangiava tutte 'e tozzole che teneva e se stipava 'o piezze 'e pane. Camminava, camminava, arriva a 'nu punto, teneva famme, va 'a piglià 'o piezzo 'e pane, e chisto le care 'a mano e a chillo pizzo addo' carétte, sfunnava. 'A vecchia se va p'affaccià e bére 'na 'rariata, se 'ncresceva 'a scennere là bascio. Ma pecché nu' teneva chiù pane, scennette. Scenne abbascio e trova 'na tavola tutta ben priparata, 'e tutte cose apparecchiata, e nu' ci steva nisciu- no. Virètte accussì, alluncàva 'a mano pe' si piglià caccosa, piglia 'a cucchiara se movette e le rette 'na mazzata 'ngoppa 'a mano, rice:
- Sora vecchia, quanno è benuto 'o patrone, allora se mangiarrà.
'A vecchia se stette cuieta, cuieta, pe' beré cu' ne succereva, quando una botta sente nu' fruscio. Vene 'n'aucellone, se leve 'a spoglia e arreventa 'nu bellu giovine: s'as- sette 'a seggia e se mette 'a pettinà cu' 'nu pettine r'oro e accummènza alluccà:
- Padrone 'e 'stu pettine r'oro addo' stai? - po' se lavava 'a faccia - Padrone 'e 'stu vacile r'oro addo' stai? - chiagnette 'nu buono piezzo, e po' iette a mangià. Quanno fuie all'urtimo r' 'a tavola se' sentette 'na voce - Vecchia, vieni 'a mangià!
Chella nu' si muveva, pecché nu' sapeva se chiammavano a iessa o no; ma sentette ricere 'n'ata vota:
- Vecchia, vieni 'a mangià!
- Ca' nu' ci sta nisciuno, - ricette 'a vecchia - mo' vavo i' e zitto, e chello che 'ne vene, vene!
Iette e mangiava senza ca nisciuno l'avesse ritto niente. A l'urtimo le superchiavano cierti purpette, iessa spaccava 'o piezzo 'e pane e ci 'e mettette rinto; e si steva là,
quanno sentette 'na voce:
- Vecchia, iesce fore!
Chella nu' buleva ascì, ma senza sapé né comme né quanno si truvava 'a fore. Venimmegénne mo', 'a vecchia sapette 'o banno ca 'o Re aveva fatto minà, e pinzava a ghì' iessa pure là a cuntà 'stu fatto pe' beré se 'a figlia r''o Re se muvéva a rìrere o a parlà. Iette e, quanno fuie abbascia 'o purtone, ricette a 'e servi ca iessa vuleva saglì 'ngoppa. Chillu nun 'a vulevano fa saglì; ma pecché a légge iera pe' tutte e ci puteva ì' chi vuleva, 'a vecchia sagliette. Se vulette 'nghiùrere rinto 'a 'na cambra iessa e 'a figlia r' 'o Re: accumminzàva a dicere:
- Signora mia, sentite 'nu fatto ca' m'è succiesso, verìte quanto è bello.
Chella tutta se muveva, tutta se sturciava ca nu' buleva sentì niente; ma 'a vecchia seguitava 'a dicere:
- M'abbuscai 'nu piezzo 'e pane, quanno arrivava 'a 'nu pizzo me carette, piglia là sfunnava.
'A signora tutta se sturcciava ca nun se ferava r''a sentì proprio; 'a vecchia 'o beréva:
- Ma, segnurì, e sentite! sentite appriesso quanto è bello, avit'a veré appriesso quanto vène bello - niente, 'a signora se tirava tutta quanta, e 'a vecchia seguitava - A chillo pizzo addo' se sfunnava, veriette 'na 'rariata, sciennette abbascio e truvava 'na tavola tutta priparata; ietta pe' mi piglià 'na cosa, e 'a cucchiara s'aizava e me rette 'na scòppola 'ngoppa a mano. E po' sentiette 'na voce: Sore vecchia, quanno ha mangia- to 'o padrone allora se mangerà! I' m'annascunniette, quando una botta sente 'nu frusce. Venette n'aucellone ('a signora accuminzava a sentì cu' piacere); chisto trase rinto, se leve chella spoglia e se mettette alluccà: Padrone 'e 'stu pettine r'oro addo' stai? Po' se lavava 'a faccia: Padrone 'e 'stu vacile r'oro addo' stai? Po' se iett'a mirà rint''o specchio: Padrone 'e 'stu specchio mio r'oro addo' stai?
Rispunnette 'a signora:
- Conta, vecchia, ca mi piace; conta, vecchia, ca mi piace.
- E sentite, sentite! chistu giovine po' si mettette 'a chiagnere e doppo iette a mangià. All'urtimo supirchiavano cierte coselle, sientette 'na voce: Iesci vecchia,vieni a mangià! I' 'a verità nu' buleva ascì, pecché nu' sapeva cu' chi 'a puteva avé; ma, po' verènne ca là ci steva nisciuno chiù, asciette 'a mangià, mi saziava e po' all'urtimo me stipaie pure roie purpette ca 'e tengo ancora, e pe' tale segno pruvàtene una. Chella s''a mangiava, e 'a tantu tiempo aveva pruvato niente chiù, chesta le parette tanto sapurita, e spiava 'a vecchia:
- Rimme mo', comme va' che te n'asciste?
- Sentite, roppo mangiato sentiette 'na voce: Vecchia, iesci fora! I' nu' buleva ascì; ma senza sapè comme, me truvaie fora.
- Me ci vuò purtà?
- Gnursì!
- Ma nu' dicimme niente a papà, facimme passà primma ruie iuorni.
'O Re sentette 'a figlia parlà:
- Ebbiva, ebbiva 'a vecchia! E' stata femmena capace 'e fa' parlà 'a figlia mia. A te spetta 'o riale - e le retta 'na gran summa.
'A figlia faceva:
- Papà, 'sta vecchia l'avimme fa' sta' 'nu poco cu' nuie.
- Sine, figlia, falle sta' quanto vuo' tu.
'Ncapo 'e sett'iuorni chesta recette vicino 'a vecchia:
- Ce ne vulimmo fuì stanotte?
- Comme credite vuie.
'A notte se ne fuiettero. Quanno fuie p' 'a via chella faceva:
- Zì' vecchia, tu addo' mi puorti?
- Camminate, 'e nu' ve 'n'incaricate.
Arrivavano a chillu pizzo, 'a vecchia se luvava 'o piezzo 'e pane 'a rinto 'o panare, 'o vuttava 'a chillu pizzo, là se sfunnava, rice:
- Scennite!
Scinnettero là bascio, e là po' ce steva 'a cucina. Ricette iessa vicino 'a signora:
- Trasite, e bulite viré chesta comme fa'.
Si iette 'a piglia' 'nu maccarone, e sentette 'na voce:
- Sore vecchia, quanno ha mangiato 'o padrone e ia padrone allora se mangerà.
Iette 'a piglià 'na purpetta, e 'n'ata vota:
- Sore vecchia, quanno ha mangiato 'o padrone e ia padrone allora se mangerà.
'A vecchia se n'iette e si mettette annascosta rinto 'a cucina 'nzieme co' 'a signora.
Ammanticate sentono 'nu fruscie. Arriva l'aucillone, si mette 'a fa' 'a capo:
- Padrone 'e 'stu pettine r'oro, addo' stai?
Si lava 'a faccia:
- Padrone 'e 'stu vacile r'oro, addo' stai?
Si va a mirà:
- Padrone 'e 'stu specchio mio r'oro, addo' stai?
Se facette tantu chianto, e 'ncapo 'a 'nu' poco 'e tiempo iette 'a mangià. Comme si mettette a tavola, se sentette 'na voce:
- Signora, vieni 'a mangià!
'A vecchia ricette:
- Signo', chelle certo chiàmmano a buie?
'A signora nu' ci vuleva ì', ma 'a vecchia accumpagnava iessa rinto 'a casa addo' si steva a mangià. Chesta va pe' se mettere a tavola, vere l'aucellone, 'o canuscette. Chillo pure aveva canusciuto a iessa, e le spiava:
- Comme va' ca te truovi ca'?
- So benuta 'a truvà a te: m'è fatto fa' tantu cammino, alla fine t'aggio truvato.
- Chi t'ha accumpagnato?
- 'Na vecchia.
- Embè mangiàmme nuie, facìmme mangià a iessa; e po' n''a mamnnàmme, e nuie ce stamme 'nzieme.
Quanno fuie all'urtimo r' 'a tavola, facettero mangià 'a vecchia e po' rice:
- Vecchia, iesci fora!
- M'aggia purtà pure 'a signora.
- 'A signora rummàna ca'.
- E comme aggio fatto tanto pe' ci 'a purtà, e mo' iessa rummàne e ì' esco?
'A vecchia se truvava fora; e ogne bote ca buleva trasì e minava 'o piezzo 'e pane, là nu' sfunnava chiù. L'aucellone tanto c''a vuleva bene, le rette tutte e chiave e se n'iette. Essa s'affacciava 'a fore 'a finesta, verette 'na vecchia, ricette chelle vecchia:
- 'O marito vuoste vi vo' bene?
Ricette iessa, rice:
- Comme no? chillo m'ha rato tutte 'e chiave 'mmano.
- E i' rico ca manco v' 'a rate tutte quante.
Ricette iessa:
- Vuie che dicite, comme nu' m'ha rate tutte quante?
Piglia, iessa se 'ne trasette tutta ammussata, venette l'aucellone 'a truvava accussì, ricette:
- Tu pecché stai accussì?
Ricette iessa:
- Sì, ricìte ca 'me vulite bene e 'na chiavetella nu' m'avite rate.
- Mo' me vuò perdere. I' pe' te cuntentà, t'a rongo… ma tu mi pierdi.
- 'N'avite paura. Ràteme 'a chiavetella, e 'nu' ve n'incaricate.
- Embè, teccatelle; ma ricuordete ca tu iesci fora po'.
- No, i' no' arape a nisciuna parte!
Chillo l''a rette, e se 'n'escètte. Isso ascètte. Piglia, chella arapètte chella purtellùccia, e ci ascette 'nu cavallo 'e vrito. Ce steva 'nu cavallo 'e vrito e ce steva l'aucellone a cavallo pure 'e vrito. Piglia, chesta rice, e 'o cavallo camminava e se scatuzzàva e iessa ascette fore a 'o palazzo. Chesta se n'iette, se mettette 'ncammino. Camminava, camminava e chiagneva; scuntàva 'nu vecchiariello, rice:
- Bella giovine che?bai facenne?
- E lassem'ì'.
- Ma pure rillo, ti potessi ra' cacc'aiuto.
Chella le recètte tutte cose, piglia isso rice:
- Tèccate 'stu buttigliello r'acqua, tu va là e sirògne 'o cavallo e a isso.
Chesta va là e suregnètte a tutte duie, e arriventàvano 'n'ata vota comm'erano, ma chillo le ricette:
- Va, vatténne mo'! no' aggio che te dìcere. I' t' 'o diciette.
Piglia, chella se n'iette, e ghiètte rinto 'o palazzo r''a mamma 'e l'aucellone, ma nu' sapeva ch'era 'a mamma 'e chillo. Ricette 'nfaccia 'a sentinella:
- Recìte accussì 'a signora: se me vo' tenì pe' purtinarie.
Chillo recèttero ca sì, e iessa se steva là tanto ca 'ncapo 'e tiempo facette 'nu peccirillo e 'o mettette nomme Marchionne. Quanno fuie 'a notte, l'aucellone iette là, 'o pigliava; rette adduobbie 'a mugliera e si mettette a bucà 'o peccirillo. Rice.

Fa la nonna, Marchionne,
se la 'ngnora n''o sapesse,
cu' bacile r'oro ti lavasse,
cu' fascia r'oro te 'nfasciasse,
cu' connela r'oro te vucasse.
Se li valle nu' cantassero,
se 'e campane nu' sunassero,
se maje jorno nu' facesse,
papà tuio cu' tico stesse.

E se ne iette. 'A notte appriesso va 'n'ata vota, trase rinto 'a casa r''a mugliera, le ra' adduobbie e se piglia 'o figlio e ci si mette a cantà 'a nonna:

Fa la nonna, Marchionne,
se la 'ngnora n' 'o sapesse,
cu' bacile r'oro ti lavasse,
cu' fascia r'oro te 'nfasciasse,
cu' connela r'oro te vucasse.
Se li valle nu' cantassero,
se 'e campane nu' sunassero,
se maje jornu nu' facesse,
papà tuio cu' tico stesse.

E se n'iette 'n'ata vota. Quanno fuie a matina, 'o padre 'e l'aucellone iette a passià pe' bascio, là stevano 'e carcerati, 'o verettere. Rice:
- Sua Maestà, grazia!
- Che grazia vulite?
- Nuie avimme sentute pe' doie notte:

Fa la nonna, Marchionne,
se la 'ngnora n' 'o sapesse,
cu' bacile r'oro ti lavasse,
cu' fascia r'oro te 'nfasciasse,
cu' connela r'oro te vucasse.
Se li valle nu' cantassero,
se campane nu' sunassero,
se maje jorno nu' facesse,
papà tuio cu' tico stesse.

Rispunnette isso:
- Embè, s'è 'o vero, i' vi faccio caccià 'a carcerati.
E se n'iette. Iette addo' chella 'a rice:
- Tu chi tieni 'a notte, lloco?
- Nisciuno, i' nu' saccio niente.
Ricette isso:
- Embè mettìmmece a fa' 'a posta.
Quanno fuie 'a notte ca l'aucellone iette, 'o padre 'o verette, scennètte abbascio e 'o canuscette. Rice:
- Ah! Tu, tu sive ca venìve 'a notte cà, e nu' te rive a canoscere.
Le spiava s'ierano finite l'anne r''o restino, che 'e fate l'avevano rato. Isso recette ca sì, e 'o padre se lagnava pecché nu' c'era iuto ancora là, e le spiava pecché cantava 'a nonna a chillu piccirillo. Chillo le cuntava tutte cose, comme chelle l'era mugliera, ca po' l'aveva lassate e ca isso 'o sapeva, e pecchésse ieva a cantà 'a nonna a 'o figlio. Accussì subito chiammavano 'a mugliera, chella 'o canuscette, s'aunirono e stettero sempe 'nzieme tutte e duie. E 'o Re facette caccià 'e carcerate, comme l'aveva prummìse.