Nci steva 'na vota 'na mamma; chesta no' poteva fa' 'no figlio. 'No juorno, disperata, dicìvo:
- E come, Marònna mia, no' pozzo fa' 'no figlio? Abbàsta ca ne faciarrìa uno, mmi contentarrìa, puro d' 'o fa' quant'a 'no fasulillo!
'Ncapo 'e nove misi facìvo aviramente 'no figlio quant'a 'no fasulillo, e li mettìvo nome Fasulillo. 'No juorno, 'a mamma si chiamavo 'o figlio e li dicìvo:
- Fasulì, porta 'o mangia' a pàteto, ca sta faticànno 'ncampagna.
Fasulillo risponnìvo:
- Dammìllo ca nci 'o porto!
'A mamma l'acconciàvo dinto a 'na canestrella 'na bella pizza, co' 'no poco 'e vino, e dicìvo vecino a 'o figlio:
- Va nci 'o porta! Statt'attiento; portalo chiano chiano, e no' rompe' niente.
Fasulillo si pigliavo 'a canesta e accuminciàvo a camminà'. E quanno fu pe' bia, s'assettàvo 'nterra, e si manciàvo 'a pizza, attuorno attuorno. Arrivavo add' 'o patre e l'addommànna pecché era tardato tanto, e Fasulillo risponnivo:
- Aggio trovato 'no cane pe' bia, e s'ha mangiata mezza pizza!
'O patre, poveriello, ca stava aspettanno 'o figlio, li pareva cient'anni che venéva, pecché si moréva 'e fame. Ivo a beré, e trovavo 'no poco poco 'e pizza, e mangiata attuorno atturono. Se n'addonàvo ca era stato 'o figlio, e li divo 'no sacco 'e mazzate. Fasulillo, chiagnènno, se ne ivo a casa, addo' 'a mamma. E come arrivavo, 'a mam- ma l'addommannàvo:
- Pecché chiàgni?
E Fasulillo no' rispunnéva. Mènte accossì, arrivavo 'o patre a fore muorte 'e famme, e ghieva jastemànno tanto d''a disperazione. A chesto, 'a povera mugliera avìva appiccià 'o fuoco 'n'ata vota, e facìvo 'n'ata pizza a 'o marito, chi aspettava c' 'a vocca aperta, pe' si mangià caccosa, ca tanno moréva. Po' si votavo vecino a Fasulillo, e dicivo:
- Va tira 'no cato d'acqua dinto a l'uorto.
Fasulillo jvo e cadivo dint'a 'o puzzo. 'A mamma no' senteva chiù nisciuno; e bedènno ca 'o figlio no' veneva, jvo dinto a l'uorto e accominciàvo a chiamà:
- Fasulillo, figlio mio, addo' stai?
E chi ti vo' da' Fasulillo? ca chillo era caduto dinto a 'o puzzo. 'A mamma, quanno se n'addonàvo, accominciàvo a chiagne'. Corrìvo add' 'o marito; e sulo chiagneva, e faceva:
- Fasulillo mio bello! Fasulillo mio, addo' sì' ghiuto? Come è stato?
Accossì , 'nziemo c' 'o marito asseccàro 'o puzzo, e trovàro Fasulillo muorto.

Cuccurucù,
no' nce n'è chiù!