Na vota nci steva no trainiéro ca teneva tre figli. Doppo tanta fatiche sto trainiéro se fece viecchio, e no juorno morìvo. 'E tre figli, tutti 'e tre màscoli, se spartiéro chello poco ca 'o padre teneva: 'o cavallo, 'o traino e 'o scorriàlo. 'O primo frate se pigliavo 'o cavallo, 'o secondo 'o traino, e a l'urdemo toccavo 'o scorriàlo, pecché era 'o cchiù piccirillo. Atterràto 'o padre, se ne jéro 'a ventura. 'O primo se ne ivo a cavallo: passànno pe' nnanzi a no fùnneco, 'o proprietario 'o verivo, e 'o chiamavo:
- Compà, vieni ccà.
- Che è, che buo'?
- Vuo' fa' na scommessa co' mme?
- E che è?
- Si me rici 'no cunto senza rici Nci steva na vota, io te ronco 'o fùnneco co' tutti 'e panni; si, po', sbagli me dai 'o cavallo tu a mme.
'O guaglione penzàvo: "Sulo d' 'o cavallo che me ne fazzo? Si vénco 'a scommessa,
m'accònzo bbuono co' sta potéa. E responnìvo:
- Va buo', facìmo sta scommessa.
- Allora accomménza a contà.
'O guaglione nci penzavo, nci penzavo… e po':
- Nci steva na vota…
- Ah! - fece 'o funnechiéro - è ritto Nci steva na vota, e sì' perso.
'O guaglione li lassàvo 'o cavallo, e se ne ivo. Passavo l'ato frate: senza 'o cavallo tirava 'o traino a ppèra. 'O funnechiero fermàvo pur'a isso:
- Compà, férmete 'no poco, sienti…
- Che è, che è?
- Si ddici no cunto, senza rici Nci steva na vota, te ronco 'o fùnneco co' tutti 'e panni…
- E si sbaglio?
- Pierdi 'o traino.
- E sì, e ghiàmo! - risponnìvo chist'ato frate - Prima 'e parlà, nci penzavo assai tiempo, ma appena accomenzàvo 'o cunto, fece Nci steva na vota… e pur'isso perdìvo. Posavo 'o traino e se ne ivo.
Doppo no poco arrivàvo l'ùrdemo frate. Co' 'o scorriàlo mmano, 'o iéva scoccànno: tu, ta… tu, ta… appriesso tenéva na morra 'e guagliùni chi alluccàvano e pazziàvano. 'O funnuchiéro penzavo: "O cavallo me 'o so' fatto, 'o traino pure… mò cerco 'e mme fotte pure 'o scurriàlo, e accossì no' mme manca cchiù nienti."
'O guaglinciello canoscìvo 'o cavallo e 'o traino chi stévano fore a porta. 'O funnu- chiero 'o chiamavo:
- Compariello bello, vieni a ccà.
'O guaglionciello s'azzeccavo, risse:
- Che buo', o zì'?
- Si ddici 'no cunto senza rici Nci steva na vota, te pigli 'o cavallo, 'o traino e 'o fùnneco co' tutti 'e panni. Era accossì sicuro 'e vénce ca se pigliavo già mmano 'o scurrialo e, appoggiato a 'o muro, 'o faceva scoccà. 'O guaglionciello nci penzavo sulo no poco e po' accossì contàvo:
Chella puttana 'e màmmeta
teneva na allìna
ca faceva l'ove tutte 'e matine…
jesci, jesci funnecchiéro
ca mò 'o fùnneco è tutto mio!

E se pigliavo fùnneco, panni, cavallo, traino e tutto.