Na vota nci stévene tre compari: uno faceva 'o guardiacaccia, n'ato 'o boscaiolo, n'ato 'o mastorascia. Se ncontràro na matina dint'o vosco. Rice 'o primo, 'o guardacaccia:
- Volìmo ì' a caccia 'e lupi?
- E sì, jamo. - risponnìvo 'o boscaiolo.
- A caccia? - fece 'o mastorascia - A parlà è arte leggera! Tu tieni no ribbotto, chillo tène n'accetta, e i' co' che vengo a caccia? co' 'o cazzo?
No lupo steva annaccovàto llà vicino, e sentivo. Sentènno accossì, s'appauràvo e se 'a feci co' 'e pieri. Pe' a via ricéva ncap'a isso stesso:
- 'O ribbotto saccio che è, 'a accetta 'a canosco… ma chell'ata arma non 'a saccio proprio. Che sarrà mai?
Mènte scappava, a na parte scontàvo 'na vicchiarella ca steva accogliènna 'a legna. Se ferma llà vicino, rice:
- Signo', non aviti paura, no' ve fazzo nienti! Ma vui m'avit'a rici na cosa: aggio sentùto tre cacciaturi ca volévano ì' a caccia, ognuno co' n'arma: uno steva co' no ribbotto, 'o secondo co' n'accetta, e 'o terzo è ditto ca teneva l'arma d' 'o cazzo… me sapiti rìcere che specie 'e arma è chesta?
- Figlio mio, Dio te ne libbera e scanza! - responnìvo 'a vicchiarella, e aozàvo 'a gonnella - Cinquant'anni fa chell'arma m'è fatto na piaga miezz' 'e cosce… e non è sanata cchiù!