Rind'a no monastero nci stévene sei muonaci, e 'o padr'agguardiano sette, e ognuno teneva 'o ciucciariello. Ogne matina évano circanno. No juorno, 'e muonaci pensaro 'e ì' a no paese no poco cchiù lontano, addo' no' nc'èrane stati mai. A l'entrata 'e sto paese nci steva na taverna. Se fermaro llà, uno rice:
- Qua mò ognuno piglia 'a via soia. E mosera, doje ore prima ca cala 'o sole, nce trovammo tutt'e sei n'ata vota qua, e nsieme nce ne tornamo a 'o commento.
Accossì facettero. Quanno fu 'a sera, s'accogliéro llà tutt' 'e muonaci, ma 'o tiempo non era bbuono. Rice uno:
- Cercamo a 'o tavernaro 'o piacere 'e rorme ccà.
'O tavernaro risse:
- Sì, sì… mettìti 'e ciucciarielli apposto ind' 'a stalla. Lloco nci stanno 'e lietti… e rormìte.
Roppo miss'a posto 'e ciucciarielli, sti muonaci se mettiero a mangià no poco 'e robba ca s'évano abbuscato. 'O pigliavano a rind'a bisaccia e s' 'o mangiaveno. No monaco mò, aizànno l'uocchi, verìvo na cosa appesa, na specie 'e pupazza. Rice:
- Tavernà, che tieni llà appiso?
- Ah, no' nci facite caso… chella è mamma. L'aggio mettùta llà pecché 'a notte caca ind' 'o lietto.
'O monaco romanivo appaurato:
- Maronna mia, e che modi so' chisti!
- Cùseti 'a vocca! - risse n'ato - no' songo fatti nuosti.
Finiero 'e mangià e se ne iero a ddormì. Risse no monaco:
- Stam'attienti, pecché chella è 'a mamma, e pe' cacà rind' 'o lietto l'è mis'appesa…no' nza mai succère na cosa a nui, chisto nce accìre proprio.
Quanno fu 'a notte, mènte tutti stévano rormènno, 'o tavernaro feci na bella callàra 'e polenta e ne ivo a mette na cocchiara ind'a ogni lietto. 'O primo ca se scetàvo, se guardavo:
- M'aggio fatto sotta - e scetavo 'o compagno.
- Pure i' m'aggio fatto sotta - a ogne modo tutti s'evano fatti sotta.
- E mò comme facimmo, comme non facimmo? - uno addommannàva a l'ato.
- Ottàmmoci p' 'a finestra, e fujmo - risse uno.
'O primo ca se ottàvo né alloccavo né nienti: carivo abbascio e morivo. L'ati rissero:
- Be', non è ditto nienti: è segno ca se n'è scappato. Ottàmmoci pure nui.
Se ottàro un'appriesso a l'ato, e schiattàro ncuorpo tuttiquanta. 'O tavernaro, 'a matina, no' verènno scénne nisciuno, ivo a beré. Non 'e trovavo rind' 'e lietti, e s'affacciavo 'a fenestra. S'affacciavo: 'e berìvo tutti abbascio ca non se movevano.
- I' voleva fa' sulo na pazzia… e mò? Mò aggi'a annascònne sti muonaci…
Pigliavo, e 'e mettivo rind' 'e sacchi, uno pe' parte. Po' chiamavo no facchino, uno mezzo scemo, li fece veré no sacco sulo:
- I' te ravo cinco rocati, e tu puorti sto monaco a gghittà a mmare. Te raccomanno: quanto cchiù miezz' 'o mare 'o po' ittà, pecché si no chisto torna a benì.
Mente 'o facchino portava 'o primo monaco a gghittà, 'o tavernaro preparava n'ato sacco. Quanno cchiù tardi 'o facchino tornavo, 'o tavernaro rice:
- 'O viri ca chisto sta n'ata vota qua?
Co 'a santa pacienza 'o facchino se pigliavo chist'ato sacco nguollo, e 'o portavo a mmare. Sta vota circavo e 'o ittà ancora cchiù nnanzi. Quanno tornavo llà, 'o tavernaro li feci trovà n'ato sacco.
- Tu no' 'o ietti lontano, pe' chesto 'o monaco se ne torna n'ata vota ccà.
'O facchino feci sei viaggi, pensanno 'e portà sempe 'o stesso monaco. A l'ùrdemo risse:
- Sta vota 'o vac'a ghittà proprio miezz' 'o mare, e voglio veré si vénci isso o venco i'!
Pe' 'a via trova 'o padr'agguardiano: ncopp'a no ciuccio éva circanno 'e muonaci ca non s'evano arritirati. 'O facchino, comme verìvo 'o monaco ncopp'o ciuccio, 'o acchiappàvo pe' no père, 'o tiravo nterra, tanto nce ne rivo ca 'o accirìvo. Risse:
- Mò capisco pecché tu arrevavi sempe prima 'e me: tu ivi a cavallo, i' éva a ppèra!
Se 'o mettete nguollo e portavo a ghittà a mmare pur'a chisto. Po' ivo add'o tavernàro pe' asìggi 'e cinco rocati:
- E' tornato cchiù 'o monaco?
- None.
- E comme voleva tornà? Mò sì ca no' bène cchiù, pecché i' l'aggio accìso bbuono, mènte tu no.
- Hé fatto bbuono: sei io e uno tu, sette: avìmmo levato no' commento sano sano.
Pe' chesto se rice: avimmo scopato no commento.