Nci stévene dui viecchi, no marito co' 'a moglièra. No juorno asciéro a cunto 'e morte. Faceva 'a mogliera:
- No' nza mai succéde quaccòsa a tte! I' voglio morì prima io, mai tu.
- 'A morte a chi vole se piglia. - responnìvo 'o marito.
- None, none… è meglio si 'a morte se piglia prima a mme. Comme fazzo senza 'e te?
'O marito ncp creréva. Na vota se trovavo a parlà co' no compare ca steva ncazzàto assai:
- Ma che è stato, che tieni?
- Citto, aggio sciarràto co' moglièrema. Chella fetente me mette sempe ncroce, me ntòsseca matina e sera: pure oje m'è fatto nfumà, e i', pe' non 'a veré e pe' no' 'a sènte, me ne so' asciùto.
- Ah, no! Moglièrema mia, nvece, è na santa. Tanto me vole bene ca no' nza mai avessa morì io! E' ditto ca è meglio si 'a morte se piglia a essa ca a me…
- E tu angàppi mmocca!
- Sì, i' 'a crero… chella mm' 'o ddici sempe.
- Allora sa che buo' fa'? Mìttiti rind' 'o lietto e fa finta ca sì' malato. Quanno si fa notte, i' me metto 'no lenzuolo nguollo, e vengo a càseta…
Accossì facèttero. 'O marito risse ca era malato e se mettìvo rind' 'o lietto, ma prima lassàvo 'a porta aperta. 'A sera, 'o compare ivo 'a casa, e citto citto trasìvo ind' 'a cucina co' no lenzuolo ncapo. 'A mogliera se 'o verìvo rind'a 'na vota nnanzi, e se scantàvo:
- Chi sì'? che buo'?
- Songo 'a morte - fece 'o compare - e m'aggio venuto a piglià…
- A chi te sì' venuto a piglia? I' stongo bbona! Isso è malato, marìtimo - fece 'a mogliera e 'o portavo ind'a càmmera addo' steva 'o marito.
'O marito s'aozàvo a rind' 'o lietto:
- Ah, fetente, fetente! - risse - E chesso pecché volìvi morì tu a 'o posto mio