Nci steva na vota na mamma co' cinco figlie, tutte fammene ca s'avevan'a mmaretà. No juorno, no guaglione ne verivo una mènte inghéva 'a conga 'a fontana. 'A verivo e se ne nnamoravo. Addommannavo a chi era figlia e addo' steva, e po' s'abbiàvo llà. Tozzolàvo e assìvo 'a mamma:
- Che bulite, giuvinò?
- I' so' benuto pecché aggio vista a fìglita 'a fontana: m'è piaciuta e me 'a voglio spusà.
- Bello giuvinò, i' ne tengo cinco. Qual è chella ca piaci a tte?
'O guaglione no' fu capaci 'e fa' capì chi era. Allora rice:
- Si me 'e fai veré, te rico chella ca piace a mme…
- I' te 'e facesse veré, ma a sto momento no' nc'è niscuno: so' tutte ncampagna a fatecà.
- Bè, si è accossì, torno moséra.
Quanno 'e figlie tornaro a campagna, nce 'o ddicivo e addommannavo chi era jut'a fontana e aveva visto sto guaglione. 'E figlie accommenzàro a letigà:
- Chillo è mme ca vole…
- None, a mme è bisto…
- I' so' ghiut' 'a fontana…
'A mamma no' sapeva comme se resòlve, pure pecché 'e cinco sore s'assommigliàveno tutte. E po' si fosse stata pe' essa, vuttàva nnanzi 'a cchiù grossa.
- Comme aggi'a fa', comme non aggi'a fa'? - a l'urdemo che penza? Se chiama attuorno tutt'e cinco, rice - No' sciarràte. Verimo chi è cchiù capaci. Facimo na gara, verimo 'a sciorta a chi aiuta. Chi venci sta gara chella, quanno è crai, i' mostro a chillo uaglione.
- Sine, sine, facimo accossì. - rìceno tutte.
- E che gara avima fa? - addommannavo 'a cchiù piccirella.
Penza e penza, 'a mamma truvavo. A rind' 'o focolare tiravo fore 'a cénnera, ne fece no montone e risse:
- Chi co' no pìrito sbrasa cchiù cénnera, chella se sposa.
E accossì facettero. Prima 'a cchiù grossa s'abbicinavo a 'o montone, se calavo e fece no pirito, ma spostavo sulo no poco 'e cennera. Po' fu 'a vota 'e a seconda… mènte stévano tutte llà accorte a chillo juoco, ind' 'o meglio arrevàvo 'o guaglione. Se fermavo fore a porta e stivo a guardà curiuso chello ca facevano 'e cinco sore. Quanno sentette 'e pìriti e capivo chello ca stévene facenno, fece na faccia. Aozàvo nguollo, lassavo tutto e se ne ivo.
Chelle, scummetto, stanne ancora llà pe veré chi co no pirito sbrasa cchiù cénnera a copp'a 'o focolare…