'Na vota ce stevano tre mariuoli: uno se chiammava Cricche, uno Crocche e 'n'ato Manecancine. Facettero 'a scummessa pe' beré chi era cchiù mariuole fine. Se mettettero 'ncammino. Cricche, ca iera 'o primme, verette 'na caiazza 'ngopp'a n'avure, e rice:
- Vulìte veré ca i' leve l'ove 'a sotto 'a chella caiazza, e nun 'n'a faccio addunà?
- Sine! Vulimme veré!
Cricche sagliette 'ngoppa l'avure pe' se piglià l'ove. Ammènte se 'e steve piglianne, Crocche li tagliava 'e tacche 'a sotto 'e scarpe, e se 'e mettette rinto 'o cappiello. Ma, ammènte Cricche se stepava l'ove, Manecancine l''e rubava e se l'annascunnètte. Scennètte Cricche, rice:
- I' so' stato 'o mariuolo cchiù fine, c'aggio luvate l'ove 'a sotto 'a caiazza.
Rispunnette 'o secondo:
- 'O cchiù fine so' stato i', ca t'aggio tagliate 'e sole 'a sotto 'e scarpe, e nu' te n'aggio fatto addunà - e se luvave 'o cappiello pe' 'e fa' veré, ma nu' ce 'e truvava. Se vota e dice 'o terzo:
- Chiù fine 'e tutte sonche i', ca pecché, ammente tu te stepave 'e tacche, i' te l'aggio arrubbate. E già ch'ie cheste, me voglio spartere a vuje, pecché ce vaco a perdere.
E se spartette. Ieva arrubbanne isso sule, e tanta robbe se facette, ca 'nfine arrevava a 'na città, se 'nzurava e se mettette 'a puteca 'e caso e d'uoglie. 'Nu juorno 'e frate, iènne sempe arrubbànne, se truvavano a chesta città, e berèttero proprio chella putéca. Recette uno vivino a chill'ato:
- Trasìmme rinto, verimme: putéssemo fa' caccòsa!
Trasèttero, rice:
- Bella fe', rance a mangià.
- Che bulìte?
- 'Na fella 'e casacavàllo.
Ammènte chesta 'o steva taglianne, chille duie ievano ucchiànne pe' beré addo' pute- vano aggranfà caccosa. Verettero roje pacche 'e puorche appese. Uno zenniàva chill'ato, e decèttero che 'a notte s''o bulévano ì' a piglià. 'A mugliera 'e Manecancine se n'addunàva e se stette zitta. Quanno venette 'o marito li cuntava ogni cosa. 'O marito, ca iera vero mariuole, sùbeto capètte. Rice:
- Chiste saranno Cricche e Crocche, ca se vonne arrubbà 'o puorche nuosto. Va buo- no! Mo' acconce i'!
Pigliava 'o puorche, e 'o mettette rinte 'o furno, e 'a sera se cuccava. Quanno fuje 'a notte, chille duje iettero p'arrubbà e nu' truvavano 'o puorche; iettero verènne pe' tutte parte e n''o truvavano. Piglia 'o secondo che penza e fa'? S'accosta zitto zitto a 'o pizzo addo' steva cuccata 'a mugliera 'e Manecancine, e rice:
- Vué, vué, i' nu' trove 'o puorche! Tu add''o mettìste?
Chesta se crerètte ca iera 'o marito, sùbeto respunnette:
- Ruorme, ruo'! Tu te recuorde ca 'o mettiste rinte 'o furno?
E se turnava addurmì. 'E duje mariuole ascettero, se pigliavano 'o puorche e se n'iettero. Cricche 'o purtava 'nguolle, si iette a butà e berètte ca rinto 'o giardino r''o frate ce steva 'a menesta. Recette vicino a Crocche:
- Va tu rint''o giardino, fa nu' poco 'e meneste, amméne quanno scinne a casa fellàmme 'na felle 'e puorche e ci a cucìmme.
Chisto iette, e Cricco s'abbiava. Venimcénne mo' ca Manecancine se scetava. Iette a beré e nu' truvava 'o porche. S'addunàva ca rinto 'o girdine suie ce mancava 'a menesta, rice:
- Va buone, m'hanno 'a fatto, e m'hanne saputo fa'. Mo' l'acconce i'!
Se facette 'nu bellu fascio 'e meneste e s''o mettette 'ncuollo, e curreva curreva. Arrivava a Cricche co' 'o puorche 'ncuollo; e, senza parlà, le facette segno ca vuleva 'o puorche. Chillo crerènnese ch'iera Crocche, se pegliava isso 'o fasce 'e meneste, e le rette 'o puorche, e Manecancine c''o puorche 'ncuollo se ne iette 'a casa soja. Cricche arrevava 'a casa co' 'o fasce r'èvere. Recette Crocche:
- E 'o puorche addo' sta?
- Tu, 'o tiene tu.
- I' nu' tengo niente.
- Tu m'hai luvate 'mieze 'a via.
- Addo' mai? Tu m'hé mannato a fa' 'a menesta.
Cricche po' le cuntava tutte 'o fatto, e cunchiurèttero ca Manecancine iera state ca ci aveva luvate, e ca isso iera 'o cchiù mariuole.
