A parecchi misi 'no paese no' teneva prèvete. Sulo doppo tanta tiempo 'o vescovo nci mannàvo uno. Chisto mò no' nc'era mai stato a sto paese e no' canosceva 'a ggente e manco che abitudine tenèvono. 'E femmene, quanno se évano a confessà co' 'o prèvete 'e prima, si avevano traruto 'o marito o 'o nnammorato, ricévono:
- Aggio pigliato 'na sciugulacchiàta! - 'o prèvete capiva, nce deva 'a penitenza e 'e mannava.
Comme arrevàvo 'o prèvete nuovo, accossì dint'a chiesa accommenzàvo na processione 'e femmene ca se volevano confessà. Ivo una:
- Zi' prè, i' aggio sciugulacchiato.
'O prèvete, ca non capiva, rice:
- Viri 'e non sciugulacchià cchiù. - e 'a mannava.
Ne ivo n'ata, e pure chesta:
- Zi' prè, i' aggio sciugulacchiato.
- Ma comme mai? A sto paese sciugulacchiate tutte?
Doppo ne ivo n'ata, po' n'ata ancora… quante fémmene èvano, tutte erano sciugu- lacchiate, tutte dicevano 'o stesso. Pensavo 'o prèvete: "Int' 'a che paese so' capitato! Chi sa ste bbie comme so' dirotte! Sciugulacchiéino tuttequanta ste fémmene!"
Na vota se ivo a confessà 'a moglièra d' 'o sìnnaco:
- Zi' prè, sta semmàna i' aggio scugulacchiata doje vote.
- Ma com'è stato?
- Padre, sapiti comme succère? A sto paese no' nc'è nienti, e na fémmena, chella vota ca esce…
- … sciugulacchiéia! - risse 'o prevete, ca ancora non era capito - Aggio rato 'a assoluzione a l'ate e 'a ronco pure a tte.
Quanno fu 'a festa d' 'o Santo Patrono, 'o prèvete risse messa cantata. Dint' 'a chiesa nci steva tutto 'o paese, e 'a prima fila nc'era assettàto 'o sindaco co' 'a fascia. A 'no certo momento 'o prèvete saglivo ncopp'a pùrpito e accommenzavo 'a prerecà:
- Prima 'e tutto i' aggia da' n'avviso. Tutte 'e femmene ca se vèneno a confessà pare ca pigliano sulo sciugulacchiàte. Mbè, c'aspettate a aggiustà ste bbie? Proprio l'ato juorno pure 'a mogliera d' 'o sindaco m'è ditto ca sulo sta semmana è sciugulacchiata doje vote…
Tanno pe' tanno calavo allora 'no silenzio. 'E femmene cangiàro culore, e po' rind' 'a na vutata r'ruocchi squagliàro tutte. Chella vota 'a processione se fece senza 'e fémmene…