Fore paese nci steva na taverna, e 'o padrone, quanno s'aozava 'a matina, cacciava 'a frasca cantànno:
'O padrone è assùto paccio:
qua se mangia a no' nzi paga!
Pure quanno no' teneva cche fa', se metteva fore a porta e cantava sempe chella canzone. Na vota se trovavo a passà Gesù co' tutti l'apostoli. San Pietro risse:
- Aviti sentùto? Qua se mangia e no' nze paga… e i' tengo na fame ca no' nci véco!
A ll'apostoli mancaveno sempe novantanove lire pe' ne fa' ciento. Pe' chesto sùbbeto trasèttero e s'assettàro a tavola. Mangiàro ngrazia 'e Dio, e a l'ùrdemo Gesù chiama- vo 'o tavernaro:
- Buono cristià, nui te volimo rengrazià…
- Iàti co' 'a Marònna, no' m'avita ra' nienti - po' nci penzavo no' poco, e risse - Averamente na cosa 'a putìssive fa' pe' mme…
- Dicìti, dicìti.
- Arret' 'a taverna tengo n'uorto, e dint' 'a l'uorto nci sta n'àrbero 'e fico…
- Embè?
- I' no' nne pozzo mai mangià uno, pecché chi passa passa, se ferma e se 'e coglie. I' ve cerco 'a grazia 'e fa' restà attaccato a l'àrbero chi nci saglie ncoppa.
- Chesto è tutto? - risse Gesù e benedicivo l'arbero.
Quanno fu 'o tiempo d' 'e fiche, no juorno 'o tavernaro sentivo alluccà rind'a l'uorto: corrivo e nci trovavo uno co' 'e mmane attaccate a l'arbero 'e fico. Li fece na la- vata 'e capa, e 'o mannàvo. Saglivo, po', isso ncopp'a l'arbero e se fece na bella mangiata 'e fiche. Na staggione 'e paricchi anni doppo, però, l'arbero no' portavo cchiù frutto. 'O tavernaro chiamavo a no mastoràscia e li risse d' 'o taglià.
- Po' - risse - m'hé a fa' no fiasco co' 'o legno 'e st'arbero.
- A cche te serve? - addommannàvo 'o mastoràscia.
- Saccio a mme!
'O mastoràscia segavo l'arbero, li fece no fiasco co' no ramo, e se ne ivo. Passanno passanno l'anni, 'o tavernaro se fece viecchio. Na sera s'appresentàvo 'a Morte. Sen- z'uocchi e senza vocca, veréva e parlava:
- E' benùta l'ora tua.
'O tavernàro già a tiempo ca l'aspettava:
- Prima ca vengo co' tte, te cerco sulo no piacere.
- Che bbuo'?
- Me voglio fa' l'ùrdemo surso 'e vino… ma ieri m'è carùto 'o tappo rindo, e no' pozzo véve…
- Da' qua, nci penzo io - risse 'a Morte, e se nfilàvo rind' 'o fiasco.
'O tavernaro fece comm'a no lampo: rind'a na botta 'a nchiurìvo ind' 'o fiasco:
- Mò lloco sì', e lloco riesti.
Mò che succirìvo? Co' 'a Morte nchiusa llà dinto, nisciuno cchiù moréva ncopp' 'a faccia d' 'a terra, nfino a cche, no juorno, a taverna tornavo Gesù:
- Te pare bello ca te tieni 'a Morte carcerata rind'a no fiasco? Ncopp' 'a terra nci so' tanta viecchi ca 'a cercano, e 'e lamienti arrivano ncielo.
'O tavernaro, ca s'era fatto pure isso viecchio assai, piglia 'o fiasco, li leva 'o tappo e lassàvo libbera 'a Morte. Na vota fore, 'a Morte pe' primo arraffa 'o tavernaro, po' se mette a corre p' 'o munno, piglianno a tunno, addo' cogli cogli: pìccili e grossi, 'e malati e pure 'e sani…