Nci steva no giuvinotto ca na vota a l'anno éva a vvisità Mamma Schiavona ncopp' 'o Muntagnone. No juorno, proprio mènte tornava a Muntevergine, trovavo miezz' 'a via uno stiso nterra, muorto accìso. Se fermavo e se mettivo a rimirà. A luongo 'o verettero certi zappaturi: fuie pigliato pe' sospetto e 'o fecero arrestà. Doppo ca isso stivo n'anno ncarcere, se facette 'a causa. Nci stévene dùrici testimoni, tutti cuntrari. 'O giurice l'addommànnavo:
- Rimme tu, giuvino', chi tieni pe' avvocato?
E 'o giovine risponnette:
- I' songo nnocente, e no' nn'aggio abbesuogno… e po' comme me vène m' ' a piglio.

'O giùrice nsistivo pe' li ra' n'avvocato, ma isso non 'o volìvo:
- I' tengo pe' avvocato 'a Mamma 'e Muntevergine: essa m'add'aiutà. Essa sape ca i' songo 'nnocente. E pure se me condannate, ssa morte allegramente pe' essa 'a voglio fa'!
'E cose stévano pe' se mette male pe' 'o giuvinotto, quanno, rind' 'a na vota, a 'o cielo calavo na lettera ca se ivo a posà proprio nnanzi a 'o giurece. 'O giurece pigliavo 'a lettera, ca era scritta co' parole r'oro, e commemzavo a lègge. Leggeva e co' l'uocchi sua chiagnéva:
- Sto giuvinotto è nnocente, - accossì nci stéva scritto ncopp' 'a lettera - v' 'o ddice 'a mamma soia ca sta ncopp' 'o Muntagnone.
Allora 'o giurece s'aozàvo e leggìvo 'a sentenza:
- Lassàte sto giuvinotto, pecché è nnocente.
A chella vota pure 'o giurece addiventàvo no figlio 'e Mamma Schiavona.