Nci steva 'na vota 'na gatta, chi scupàva 'a chiesia. Mènte scupava, trovavo 'no tornesiéllo e dicìvo:
- Che mme n'haggia accattà de 'sto tornesiello? Si mm'accàtto 'e pane, ne cadono 'e molliche; si mm'accatto 'e castagne, n'haggia iettà 'e scorze; si mm'accatto 'e cirase, n'aggia jettà 'e nuzze. Mo' mm'accatto 'e janco e russo, e mm' 'o metto 'nfaccia.
Accussì fece. Ss'accattàvo 'e janco e russo e ss' 'o mettivo 'nfaccia. E ssi mettivo 'ncoppa 'a finesta, ca ssi voleva 'mmarità. Passavo 'na vacca e dicivo:
- Ohi, gatta, pecché stai lloco?
- Ca mmi voglio 'mmarità.
- Ti volìssi piglià a mme?
- Lassa sentì, che voce tieni.
- Hu! Hu!
- Va, vatténe, ca mmi fai mette' paura 'a notte. Passa 'nnanzi, ca non ti voglio.
Po' passavo 'na pecora:
- Ohi, gatta, che fai lloco?
- Mmi voglio 'mmarità.
- Ti volìssi piglià a mme?
- Lassa sentì, che voce tieni.
- Mbè… mbè…
- Passa 'nnanzi ca non te voglio.
Po' passavo 'no sòrece, pure dicivo:
- Ohi, gatta, che fai lloco?
- Mmi voglio 'mmarità.
- Ti volissi piglià a mme?
- Lassa sentì che voce tieni.
- Zi'... zi… zi….
- Uh quanto mme piace! Sagli 'ncoppa ca te voglio.
'O sorecillo saglìvo, e sse stévano 'nzieme tutti dui. Quanno fu 'na matina, 'a gatta jìvo a messa, e mettìvo 'a pignata c' 'o bollito vicino a 'o fuoco pe' fa' 'a menèsta.
Essa se ne jìvo; e 'o sorecìllo rimanìvo a guardà 'a casa. 'Sto sorecìllo, chiano chiano, sse voleva arrobbà 'o bollito dinto 'a pignata; jìvo pe' ssi calà e nci cadìvo dinto. Venivo 'a gatta e ghiéva trovanno 'o sorecìllo.
Vota qua, vota llà, finalmente 'o trovavo muorto dinto 'a pignata. Ssi mettìvo a chiagne e disperà, ca aveva perduto 'o marito. E accossì fenìvo.

Cuccurucù,
saglio io e scenni tu.